31Hidi na kon, Yesus pait lako se um in kohe-kanas sa. Un net atuling mes ima halin mate'.
2Mo se na kon, muik atuli deeh nuting lalan le bel kula Yesus. Tiata oen mudung-mudung Una, le Un tao banan atuling na se leol teen in dake na, tam lo ka.
3Kon Yesus haman atuling man ima halin in mate na, le tekan noan, “Maa lako dil se mata lia.”
4Kon Un keket atuli las totoang noan, “Eta muid kit atoran agama lia lam, asa man kit boel daken tom nol leol teen in dake ka? Kit daek banan, tamlom daek dadaat ta? Kit tao banan atuli, tamlom keo tele atuli?” Mo oen totoang ete tuun.
5Kon nam Yesus dalen iil naseke', lole oen paiduil isi nol oen atorang nga, mo oen nang atuling man ima halin in mate ka. Un koon-mali le ngat nakekeon one. Hidim Un tek atuling nga noan, “Doong ku imam ma!” Tiata atuling na doong un ima ka, kon suknahkitu lam un ima ka banan meman.
6Net ela kon, atuil Farisi las putis deng um in kohe-kanas sa, hidim lakos koo-dalen mes nol atuil deng Herodes partei la, le nuting lalan halin keo tele Yesus.
7-8Oe mesan na, Yesus nol Un ima-ii las lakos se tubu Galilea suut ta. Mo undeng atuli mamo ming asa man Un in daek son nas, tiata oen totoang maas deng ingu-iung in se propinsi Galilea, propinsi Yudea, nol propinsi Idumea, le muid Una. Muik atuli mamo kon maas deng kota Yerusalem, kota Sidon, nol kota Tirus. Atuli deeh kon maas deng palun Yordan halin leol-saken. Oen totoang nuting le tutnaal nol Yesus.
9Undeng atuli mamo isi, tiata Yesus tadu Un ima-ii las le nuting belen lui mesa. Un le dehet deng lui la dapa, le halin nam oen totoang ming hapu, nol muik in kele Una lo'.
10Hmunan nu, Un tao banan atuil ili koed-ngasing mamo. Undeng na le se dedeng na, atuil in ili ngas totoang maas dil dising apa, le noan kapas Una.
a
11Nikit atuil in tom uikjale ngas ngat net Un kon, oen leas lakos se dale ka, se Yesus sila'. Hidim oen aa mumuun noan, “Ku niam meman Ama Lamtua Allah Ana!”
12Mo Un kaing oen mumuun, le tekas noan, “Mi boel tek atuil deken noan, Auk niam mo asii!”
13Hidi kon, Yesus sake lako leten mes dapa. Un haman nal atuli at ila lo, man tom nol Un dalen na. Kon oen maas saol Una.
14Ta Un tulu nal atuli at hngul dua. Un tek oen noan, “Auk huil mia, halin nam muid napiut se Au, le daid Auk atulin in nutus. Auk kon le tadu mi laok tek Ama Lamtua Allah in hida ka, se atuli li totoang.
15Nol Auk le bel mi kuasa, halin mi nulut nal uikjale kas deng atuli lia.”
16-19Atuil at hngul dua nas ngalan nas elia:
Simun (man Yesus ngali noan Petrus),
Yakobus,
Yuhanis, (Yakobus nol un palin Yuhanis, oen duas niam ama Sabadeus anan. Yesus ngali oen duas nini ngaal ‘Boanerges’, man nahin na noan ‘aan lelat ulan’.)
*Anderias,
Filipus,
Bartolomeos,
Matius,
Tomas,
Yakobus, (Alpius ana ka),
Tadius,
Simun (man muid partei pulutik Selot),
†nol Yudas Iskariot (un man hee soleng Lamtua Yesus).
20Hidi na kon Yesus nol Un ima-ii las nius deng leten na, le taam lakos uma dales. Mo muik atuli hut mamo isi maas nuting Una, tiata oen muik dola in kaa lo'.
21Ngat net ela kon, atuli las tek apa noan, “Olan ngat Yesus le. Un nadidingun in mana apa ka son.” Undeng Un nenan nas ming atuli las in aa ela ka, tiata oen maas le noan taap lai-niin Una.
22Dedeng na, guru agama las deng Yerusalem maas le tek atuil in se na ngas noan, “Hoe! Mi toe muid Yesus deken. Ta Un nulut nal uikjale ela, undeng Un haup kuasa deng uikjale kas laih tuan na, man oen noken noan, Balsebul.”
b
23Yesus ming ela kon, Un haman oen totoang le tekas noan, “Tom nol kit in nangan ni lo! Taon elol le uikjale kas laih tuan na nulut bali un apa ka esa kia!
24Eta se sonaf mes dalen, un hutun nas keng apa kam, taon elol le sonaf na tahang nal napiut ta!
25Nol eta se um isin mes dalen, atuli las taan in keng apa si-sii kam, taon elol le um-elan na titu-tema nabale la!
26Ela kon nol uikjale kas, eta oen mus apa mes nol mesa lam, taon elola ko oen sisakes! Eta ela son nam, oen dudus-didaan!
27Eta atuli le maa nuhu-dau sa-saa se atuil kuat mes uma kam, un musti but tele atuling kuat na muna le. Hidi halas-sam, un nuhu-dau nal atuling na sa-saa las.
‡
28Tiata Auk tek mi meman: Ama Lamtua Allah tade son, le kose soleng atuli li in kula-sala ngas. Nol eta atuli li bilu-aa atuil didang ngam, Ama Lamtua Allah kose soleng nal un in kula-sala na nabale.
29Mo eta muik atuli brain in bilu-aa Ama Lamtua Koo la kam, didiin apan-kloma ki kiamat kon, Ama Lamtua Allah kose soleng un in kula-sala na pait lo ka!”
c
30Yesus aa ela, undeng oen noken Un noan, “Atuling na tom uikjale son!”
31Hidi kon, Yesus ina ka nol Un palin nas lakos bus el um na, le noan tutnaal nol Yesus. Lakos lius se uas kon, oen dil se likun na tuun, le tadu atuli laok haman Yesus.
32Se oras na lam, Yesus daad le dehet nol atuli hut mamo. Kon atuli maa tekan noan, “Papa! Paap ina ka, nol Paap palin nas dil ne likun nua. Oen le tutnaal nol Papa.”
33Mo Yesus siut noan, “Auk inang nga nol Auk kaak-palin baktetebes sas, mo asiis sa?”
34Hidim Un ngat lako el atuil in daad pukiu Una ngas, le tekas noan, “Mi totoang nias, man Auk inang nol Auk kaak-paling baktetebes sas.
35Ta atuil in muid Ama Lamtua Allah in koma ngas sa, man Auk nenan baktetebes sas.”